Një muaj paraburgim për policin që kreu vrasje në kazino  

Një muaj paraburgim i është caktuar rreshterit Sh.S. për dyshimin në vrasjen e kryer në fundjavë në një kazino në Suharekë. 

Gjykata Themelore në Prizren ka njoftuar se polici dyshohet se kishte synuar grabitje në kazino dhe kishte qëlluar punëtorin J.A., duke e vrarë me armën zyrtare të tij. Në këtë përfundim Gjykata ka ardhur, sepse të dyshuarit i mungon një fishek nga ngarkesa në 30 të tillë që i ka pasur si zyrtar policor i Kosovës dhe gjithashtu gëzhoja në vendngjarje përshtatet me specifikat e armës së tij si polic, përcjell albinfo.ch.

“I dyshuari kishte qëndruar deri në orën 05:00 në kazinonë e njëjtë dhe ishte kthyer sërish kah ora 07:30. Papritmas, gjatë lëvizjes në kazino në një moment, nxjerr pistoletën e markës Glock dhe nga një metër ka shtënë një herë në pjesën e epërme të kokës të të ndjerit me iniciale J.A., i cili ka qenë i ulur në fotele”, thuhet në njoftimin e Gjykatës.