Një muaj paraburgim për serbin, dyshohet se përgatitej për të kryer një vrasje, u paraqit si person zyrtar

Gjykata Themelore në Prishtinë, me kërkesë të Prokurorisë, i ka caktuar një muaj paraburgim të dyshuarit, R.B., shtetas i Serbisë, i cili dyshohet për veprën penale të përgatitjes së vrasjes, duke u prezantuar si person zyrtar.

Sipas njoftimit të Prokurorisë, arrestimi i të dyshuarit erdhi pas një pune hetimore disamujore, transmeton albinfo.ch.

“Prokuroria Themelore në Prishtinë, njofton se pas një pune hetimore disamujore të Prokurorit të Shtetit në bashkëpunim dhe në koordinim me Policinë e Kosovës, më 5 dhjetor 2024 është kryer bastisje dhe është bërë arrestimi i një të dyshuari me inicialet R.B., i cili është shtetas i Republikës së Serbisë, për shkak të dyshimit se ka kryer veprat penale, si në vijim: ‘Përgatitja për kryerjen e vrasjes’, nga neni 172 lidhur me nenin 27 të KPRK-së, ‘Prezantimi i rremë si person zyrtar’, nga neni 409 i KPRK-së dhe ‘Mashtrimi’ nga neni 323 i KPRK-së”, thuhet në njoftim.

Tutje, bëhet e ditur se Policia e Kosovës e ka ndjekur rastin nga prilli i këtij viti.