Nuk ka marrëveshje për emrin as pas takimit mes liderëve të partive maqedonase

Nga takimi i cili u ftua nga Kryeministri i Maqedonisë, Zoran Zaev ende nuk është ndërmarrë ndonjë marrëveshje për referendumin për emrin dhe Komisionin Shtetëror të Zgjedhjeve.

Mediat maqedonase kanë raportuar se edhe pse ka përfunduar takimi i dytë i liderëve politik ende nuk ka ndonjë marrëveshje për emrin dhe Komisionin Shtetëror të Zgjedhjeve, përcjell Albinfo.ch.

Edhe pse marrëveshje për dy çështjet e lartëpërmendura nuk kishte, liderët e katër partive më të mëdha politike kanë thënë se janë pajtuar për disa çështje tjera.

Kryeministri Zoran Zaev, nuk ka dhënë detaje nga takimi me Mickoskin e VMRO-së, Ahmetin e BDI-së dhe Kasamin e Besës,  ndër{a ka/tHeksuar se amnisti për qëllime strategjike të vendit, nuk do të ketë.

“Për qëllimet strategjike të Maqedonisë, kompromise nuk ka. Amnisti të drejtpërdrejtë ose indirekte nuk ka. Do t’i japim shansin dialogut dhe bisedimeve aq sa është e mundur. Paraprakisht Kuvendi vazhdon punën dhe propozim-ndryshimet në Kodin Zgjedhor vazhdojnë procedurat parlamentare në komisione. Pres që në takimin e liderëve të merremi vesh edhe për formimin e KSHZ-së”, tha Zaev.

Kryetari i VMRO-DPMNE-së, Hristijan Mickoski hodhi poshtë pretendimet se opozita kërkon amnisti.

“Jo. Ajo është edhe një tentativë e ashpër për të manipuluar opinionin. Nuk duhet të lejojmë që opinioni të manipulohet dhe nuk duhet që mungesat dhe lëshimet tona t’i plotësojmë me të pavërteta të cilat për qëllim kanë shpërqendrimin e vëmendjes nga problemet reale. Të lejojmë që procesi të ecë para dhe për detajet do të debatojmë në vijim”, tha Hristijan Mickoski.

Kreu i BDI-së Ali Ahmeti vlerëson se argumentet akoma nuk janë shterur dhe se duhet unifikuar të gjitha palët me qëllim lehtësimin e procesit integrues.

“Të gjithë duhet të angazhohen që të kemi një përfundim të suksesshëm, në lidhje me zbatimin dhe realizimin e marrëveshjes lidhur me çështjen e kompromisit që është arritur me palën greke. Mbetet akoma të vazhdojmë pasi që të gjitha opsionet dhe mendimet nuk janë të shterura “, deklaroi Ali Ahmeti.