Nuk ka mbaruar ende: Zvicra përgatitet për një tjetër valë të nxehti

(KEYSTONE/Andreas Becker)

Zvicra po përgatitet për një tjetër valë të nxehti, me temperatura që gjatë kësaj jave pritet të arrijnë deri në 34 gradë Celsius në disa pjesë të vendit.

Të dielën në mesditë, instituti federal meteorologjik MeteoSwiss lëshoi paralajmërim të nivelit 3 nga 4 për rrezik të lartë nga temperaturat e larta në disa rajone të Zvicrës.

Paralajmërimi përfshin zona të shumta të Rrafshnaltës Zvicerane, kantonet frëngjishtfolëse, Ticino-n dhe pjesë të Zvicrës Lindore.

Sipas parashikimeve, temperaturat do ta kalojnë pragun prej 30 gradësh që në fillim të javës. Në pjesët perëndimore të Zvicrës, temperaturat maksimale mund të arrijnë deri në 34 gradë Celsius.

Paralajmërimi i nivelit 3 nga MeteoSwiss nënkupton një rrezik të konsiderueshëm nga nxehtësia, veçanërisht për personat e moshuar, të sëmurët kronikë, gratë shtatzëna dhe fëmijët e vegjël.

Autoritetet këshillojnë qytetarët të shmangin aktivitetet e rënda fizike gjatë orëve më të nxehta të ditës, të konsumojnë mjaftueshëm lëngje dhe, sa është e mundur, të qëndrojnë në ambiente të freskëta.

Vala e re e të nxehtit vjen pas një periudhe me temperatura të larta në Zvicër, ndërsa nxehtësia dhe thatësira këtë verë kanë shkaktuar shqetësime në disa sektorë dhe rajone të vendit.