NYT: Shqetësim në rritje për drejtimin autoritar që po merr Maqedonia

Ky shtet i vogël, sipas NYT po bie në sy me sforcimin që po i bën identitetit të tij përmes një hiperpatriotizmi tipik ballkanik

Gazeta autoritative amerikane “New York Times” në numrin e djeshëm të saj ka botuar një artikull me tone shumë kritike ndaj Maqedonisë, respektivisht trendit që ky shtet i vogël ballkanik po ndjek drejt forcimit të autoritarizmit.

Ky shtet i vogël, sipas NYT po bie në sy me sforcimin që po i bën identitetit të tij përmes një hiperpatriotizmi tipik ballkanik. Trumpetimi i rrënjëve antike të Maqedonisë, përmes ndërtimit të monumenteve dhe ndërtesave tjera megalomane në frymën e “kërkimit të frymës kombëtare” është edhe një nga kritikat që Maqedonisë i drejton raporti i fundit i progresit, i bërë nga Bashkimi Evropian.

Sipas vëzhguesve të pavarur të jashtëm. kjo megalomani më shumë tregon tendencat antidemokratike majtiste të qeverisë.

Mesazhet telefonike që të përshëndesin me të hyrë në territorin e Maqedonisë tregojnë pikërisht këtë frymë, me tekstin “Mirëseerdhët në Maqedoni, djepin e civilizimit”, vëren gazeta.

Por, krahas kësaj, sipas raportit, të cituar nga gazeta amerikane, Maqedonia ka bërë hapa mbrapa edhe sa i takon lirisë së medieve dhe nuk ka bërë progres thelbësor në fushën e sundimit të ligjit. raporti i BE-së ka nënvizuar se mediet e pavarura po i nënshtrohen gjithnjë më shumë presionit politik dhe frikësimeve nga ana e subjekteve qeveritare.

Kritika për autoritarizmin që po ngulfat ngadalë Maqedoninë ka drejtuar edhe Grupi Ndërkombëtar i Krizave, shkruan NYT, sipas një raporti të të ciit faktori që po minon shtetin multietnik të Maqedonisë është nacionalizmi etnik maqedonas, gllabërimi i shtetit që po e bën kryeministri me partinë e tij, humbja e pavarësisë se medieve, gjyqësisë, segregacioni në shkolla dhe zvarritja e procesit të decentralizimit”.

Ndërkaq, duke marrë mendimin e partisë në pushtet VMRO, gazeta citon Vladimir Gjoprcev, një zyrtar të kësaj partie i cili tendencat e qeverisë për “kthim në identitet” i konsideron legjitime. Por, i pyetur rreth kritikave nga jashtë rreth medieve dhe gjyqësorit të mbikëqyrur, Gjorcev e devijon muhabetin: ai flet për qendrat e reja tregtare dhe parqet e biznesit në periferitë e Shkupit, të ndërtuara me investime britanike dhe amerikane.

Ai thotë se Maqedonia para njëzet vitesh për herë të parë në historinë e saj është bërë shtet i pavarur . “Përfundimisht ne mund ta bëjmë disenjimin e brendshëm të dhomës sonë të ndejës”, ka thënë Gjorcev.

New York Times vë në pah se edhe partitë shqiptare të Maqedonisë, të cilat përfaqësojnë të paktën 25 për qind të gjithë popullatës së vendit, janë shprehur të shqetësuara me insistimin që qeveritarët po bëjnë drejt theksimit të “rrënjëve antike” të maqedonasve. Kjo, sipas tyre po largon edhe aleatët e Maqedonisë në BE.