OBSH paralajmëron për rritjen e sëmundjeve tumorale

pixabay

Sëmundjet tumorale vazhdojnë të përbëjnë një ndër sfidat më të mëdha për shëndetin publik në nivel global. Sipas të dhënave të Organizatës Botërore të Shëndetësisë, gjatë vitit 2024 rreth 9.7 milionë persona humbën jetën si pasojë e kancerit, ndërsa miliona të tjerë u përballën me pasoja të rënda nga kjo sëmundje.

Një pjesë e konsiderueshme e viktimave ishin persona në moshë aktive, nga 30 deri në 69 vjeç, çka tregon ndikimin e madh të kancerit në shkaktimin e vdekjeve të parakohshme. OBSH vlerëson se afërsisht një në nëntë burra dhe një në trembëdhjetë gra rrezikojnë të humbin jetën nga kanceri para moshës 75-vjeçare.

Në shkallë botërore, sëmundjet tumorale përbëjnë rreth 16.5% të të gjitha vdekjeve dhe renditen si shkaku i dytë më i madh i humbjes së jetës, pas sëmundjeve të zemrës dhe enëve të gjakut.

Tek burrat, kanceri i mushkërive mbetet forma më vdekjeprurëse, me rreth 1.3 milionë viktima gjatë vitit 2024. Pas tij vijnë kanceri i zorrës së trashë dhe ai i mëlçisë, të cilët kanë shkaktuar secili rreth gjysmë milioni vdekje.

Ndër gratë, kanceri i gjirit vazhdon të jetë lloji që shkakton më shumë humbje jete, me rreth 700 mijë viktima. Në vendet pasuese renditen kanceri i mushkërive dhe ai kolorektal, me qindra mijëra raste fatale çdo vit.

OBSH paralajmëron se numri i rasteve me kancer pritet të rritet ndjeshëm deri në vitin 2050. Ekspertët theksojnë se diagnostikimi i hershëm, vaksinimi ndaj disa infeksioneve që lidhen me zhvillimin e kancerit dhe ndryshimi i stilit të jetesës mbeten ndër mënyrat më të rëndësishme për të parandaluar sëmundjen dhe për të ulur numrin e viktimave.

Reduktimi i konsumit të duhanit dhe alkoolit, si dhe lufta kundër obezitetit, konsiderohen masa kyçe për përmirësimin e shëndetit global.