OEK pret një delegacion të parlamentarëve zviceranë

OEK - fb

Kryetari i Odës Ekonomike të Kosovës, Lulzim Rafuna, ka pritur sot në selinë e OEK-ut një delegacion të parlamentarëve zviceranë, anëtarë të Komisionit parlamentar të “European Free Trade Association”, e të cilët po vizitojnë Kosovën në kuadër të negociatave për një marrëveshje për tregti të lirë mes Kosovës dhe EFTA-s.

Ai u shpreh se nga bashkëpunimi mes Kosovës dhe EFTA-s do të përfitonin të dyja palët si dhe foli për fushat kryesore në të cilat po zhvillohen bizneset kosovare.

“Bizneset kosovare janë duke depërtuar në tregun europian dhe më gjerë”, u shpreh Kryetari Rafuna dhe ftoi që Kosova të përkrahet në nënshkrimin e marrëveshjes për tregti të lirë me EFTA-n.

“Zvicra është ndër përkrahësit e mëdhenj të Kosovës. Përkrahja për një marrëveshje me EFTA-n do të kontribuonte që bizneset kosovare të rriten dhe të kontribuojnë edhe më shumë në stabilitetin e Kosovës”, u shpreh tutje Rafuna.