Olsi Çala fiton çmimin e Salzburgut për zhvillimin e skenarit filmik

Skenaristi dhe gazetari me origjinë nga Shqipëria u vlerësua për projektin “Do Stars Also Have Wishes?”, të përzgjedhur nga 14 aplikime.

Skenaristi dhe gazetari shqiptar Olsi Çala është fitues i Çmimit për Zhvillimin e Skenarit të Filmit, të ndarë nga qyteti i Salzburgut, përcjell albinfo.at.

Çmimi iu dorëzua më 6 tetor nga kryetari i Salzburgut, Bernhard Auinger, për projektin e tij filmik “Do Stars Also Have Wishes?”.

Këtë vit, një juri e pavarur përbërë nga Corinna Antelmann, Benjamin Blaikner dhe Markus Mörth shqyrtoi 14 projekte, duke përzgjedhur atë të Çalës.

Sipas jurisë, projekti trajton në mënyrë të qetë dhe të pazakontë historinë e dy të rinjve që nisin një rrugëtim drejt vdekjes, duke eksploruar kontradiktat njerëzore dhe vendimin për t’i dhënë fund jetës pa e dramatizuar atë, shkruan theinternational.at.

Çala është skenarist dhe gazetar me më shumë se dhjetë vjet përvojë në televizion, film dhe prodhim dokumentar. Me origjinë nga Shqipëria, ai jeton në Salzburg që nga viti 2024.

Çmimi përfshin një grant prej 4 mijë eurosh, të dedikuar për zhvillimin e një treatment-i për një film artistik me kohëzgjatje prej të paktën 60 minutash. Projekti do të mbështetet gjithashtu profesionalisht nga skenaristi, regjisori dhe dramaturgu Christian Frosch.

Çmimi synon t’u krijojë autorëve të rinj mundësi për zhvillimin e projekteve filmike dhe t’i afrojë ato drejt realizimit dhe aplikimit për financim e prodhim./Albinfo.at

---