Opozita sërish bllokon Kuvendin e Kosovës

Ligjvënësit e opozitës deklaruan se do të bllokojnë punën në Kuvend, deri në kohën kur kryeministri Isa Mustafa ta heq nënshkrimin nga dy marrëveshjet e fundit

Deputetë të tri partive opozitare sërish kanë bllokuar punimet e Kuvendit të Kosovës, duke shprehur pakënaqësitë për dy marrëveshjet e fundit, atë për Asociacionin e Komunave me shumicë serbe në Bruksel dhe për demarkacionin e kufirit me Malin e Zi në Vjenë. Opozitarët sërish bllokuan foltoren e Kuvendit.

Në foltore doli kryetari i AAK-së, Ramush Haradinaj, ai i Vetëvendosjes, Visar Ymeri, si dhe deputetë tjerë të këtyre dy partive dhe nga Nisma për Kosovën. Ligjvënësit e opozitës deklaruan se do të bllokojnë punën në Kuvend, deri në kohën kur kryeministri Isa Mustafa ta heq nënshkrimin nga dy marrëveshjet e fundit.

Kuvendi i Republikës së Kosovës sot është paraparë të vazhdojë seancën plenare, me pikat e papërfunduara nga mbledhja e 17 shtatorit. Në rend dite kanë qenë shqyrtimet e dyta të projektligjeve për Letërnjoftimin dhe për Treguesit gjeografikë dhe për emërtimet e origjinës.

Kryetari i Kuvendit, Kadri Veseli ka thënë se sa të jetë ai kryetar në Kuvendin e Kosovës nuk do të hyjë në seancën e Kuvendit. “Nuk është mirë të mbyllet Kuvendi”, ka thënë Veseli.

Shefi i Grupit Parlamentar të Vetëvendosjes, Glauk Konjufca ka dhënë qëndrimet e opozitës rreth zhvillimit të mbledhjes së sotme të Kuvendit të Kosovës. Konjufca, tha se pa u hequr nënshkrimi nga marrëveshjet e Brukselit nga Isa Mustafa, Kuvendi nuk do të zhvilloj mbledhje. Ai tha se askush nuk është zgjedhur për ta shitur Kosovën.

Ndërsa shefi i Grupit Parlamentar të PDK-së Adem Grabovci ka kundërshtuar qëndrimin e opozitës për ta bllokuar Kuvendin e Kosovës. “Kjo që po ndodhë nga kolegët e opozitës është një mohim i të drejtës së deputetit. Pakica po e mohon shumicën. Të gjithë deputetëve duhet t’iu lejohet mundësia të paraqesin qëndrimet dhe shqetësimet e tyre”, tha Grabovci. seanca u shty për gjysmë ore.