Osman Osmani drejton kritika ndaj ministres Sommaruga

Vënia e vizës C si kusht për shtetësinë, sipas Osmanit është “një hap para dhe tre mbrapa”, në realizimin e të drejtave të të huajve

Në manifestimin për nder të 1 majit, të mbajtur në Thun, ku është paraqitur ministrja e drejtësisë nga Partia Socialdemokrate Simonetta Sommaruga, një fjalë e ka mbajtur edhe funksionari sindikal gjegjësisht sekretari për migracion në qendrën e sindikatës UNIA, Osman Osmani.

Osmani në fjalën e tij, pasi ka tërhequr vërejtjen për rritjen e dallimeve në mes të të pasurve dhe të varfërve në Zvicër, vështrimin e ka fokusuar në disa aspekte të diskriminimit ndaj të huajve. Me këtë rast ai i ka drejtuar kritika të drejtpërdrejta edhe oratores tjetër në të njëjtin tubim, ministres së drejtësisë në Qeverinë federale, Simonetta Sommaruga. Osmani, i cili ¨vjen nga e njëjta parti me Sommaruga-n, ka shfrytëzuar nga rasti që ministren ta kritikonte për gabimet që, sipas tij, po bëhen në realizimin e të drejtave të të huajve në Zvicër.

Ai me këtë rast i është qasur në mënyrë kritike, veç tjerash edhe ndryshimit të propozuar të bazës për fitimin e shtetësisë, që duhet të bëhet sipas revidimit të ligjit mbi të huajt, (të kërkuar edhe nga Sommaruga). Në këtë kontekst Osmani ka tërhequr vërejtjen se një ndryshim i tillë, me gjithë qëllimin pozitiv, ka mundësi të jetë një hap në drejtim të gabuar.

Shkurtimi i afatit bazë për të pasur të drejtë kërkimi të shtetësisë, nga 12 në tetë vite, sipas Osmanit, është hap i mirë. Por nga ana tjetër, vënia e kushtit që, për të fituar shtetësinë duhet pasur paraprakisht vizën C, e zhvlerëson fare shkurtimin e afatit në fjalë.

Kjo, për faktin se , siç nënvizon Osmani, sidomos në disa kantone të Zvicrës qendrore, praktika e dhënies së vizës C (Leja e përhershme e qëndrimit) është tejet restriktive. Atje ka mjaft raste kur të huajt me 20 apo 30 vite qëndrimi shembullor e pa probleme me ligjin, vazhdojnë të kenë ende vetëm vizën B.

Prandaj. duke vënë vizën C si kusht për kërkimin e shtetësisë, Osmani ka thënë se po bëhet “një hap para dhe tre mbrapa”, sa i takon të drejtave të të huajve.

Osmani është ndalur edhe në ndërprerjen e njëanshme të marrëveshjes për sigurimet sociale të Zvicrës me Kosovën, nga 1 prilli i vitit të kaluar. Ai me këtë rast ka tërhequr vërejtjen për shkeljen e një të drejte bazë që u bëhet qytetarëve të Kosovës me qëndrim dhe punë në Zvicër.

Me gjithë angazhimin e sindikatave dhe subjekteve tjera, punëtorët kosovarë vazhdojnë të diskriminohen mbi këtë bazë, ka thënë Osmani. Ata, ndryshe nga të huajt tjerë me punë në Zvicër, nuk mund të vendosin vetë se ku do t`i shfrytëzojnë paratë e sigurimeve sociale të akumuluara nga puna e tyre shumëvjeçare  në Zvicër.

Ndërkaq, ministrja Simonetta Sommaruga në fjalimin e saj në Thun, të cilin e transmetojnë shumica e medieve zvicerane, u angazhua për problemin e migracionit.

Në fjalën e saj Sommaruga ka përkujtuar se “jo të gjitha problemet në Zvicër kanë të bëjnë me migracionin. Kur njerëzit ankohen për qiratë e shtrenjtuara apo për rrugët e bllokuara e trenat e stërmbushur, kjo nuk është për shkak të të huajve por si rezultat i nevojës së shtuar për mobilitet”.

Sommaruga po ashtu ka përkujtuar se integrimi i të huajve nuk është diçka që ndodhë vetvetiu, por për të duhet të punojnë të dyja palët. Ajo ka shtuar se është detyrë e të huajve që të angazhohen më shumë për integrimin në vlerat e shoqërisë ku jetojnë, duke i njohur dhe pranuar ato.