Padi për sulmuesit në Bruksel

Prokurorët belgë ngritën padi kundër katër individëve të tjerë lidhur me shpërthimet vdekjeprurëse në Bruksel më 22 mars, nga të cilat gjetën vdekjen 32 vetë dhe u plagosën shumë të tjerë, raportojnë mediat nga Brukseli.

Të pandehurit, të identifikuar si Mohamed Abrini, Osama K., Herve B. M. dhe Bilal E. M. akuzohen se kanë marrë pjesë në akte terroriste, vrasëse dhe në aktivitetet e një grupi terrorist lidhur me sulmet në aeroportin e Brukselit dhe sistemin e metrosë, transmeton VoA.

Dy persona të tjerë, të arrestuar këtë javë, janë liruar “pas një hetimi të hollësishëm”, thuhej në një deklaratë të prokurorisë, përcjell albinfo.ch.

Më herët sot policia arrestoi të gjashtin person lidhur me shpërthimet e marsit.
Dje, në një seri operacionesh, policia belge arrestoi pesë vetë, përfshirë Mohamed Abrinin, i cili dyshohet si një ndër autorët e sulmeve në aeroport dhe metronë e qytetit.

Autoritetet belge po përpiqen të konfirmojnë nëse 31-vjeçari Abrini, shtetas belg me origjinë marokene, është personi misterioz, i cili shihej në videon e regjistruar në aeroport para shpërthimit, me një kapele në kokë, por që nuk ishte identifikuar nga autoritetet.