Paditet zvicerania që donte t`i bashkohej ISIS-it

Me këtë veprim, gruaja me emrin Franziska, një zvicerane e konvertuar në islam, ka bërë shkelje të ligjit për ndalimin e grupimeve ISIS dhe Al Kaida, të klasifikuara si terroriste

Prokuroria Federale e Zvicrës ka ngritur padi kundër një gruaje zvicerane të moshës 30 vjeçare, të dyshuar se ka dashur të udhëtojë për në xhihad, në Siri. Ajo, rrugën për t`iu bashkuar “luftës së shenjtë” do ta bënte së bashku me fëmijën e saj 4 vjeçar, shkruajnë sot mediat zvicerane.

Me këtë veprim, gruaja me emrin Franziska, një zvicerane e konvertuar në islam, ka bërë shkelje të ligjit për ndalimin e grupimeve ISIS dhe Al Kaida, të klasifikuara si terroriste. E paditura është nga qyteti Winterthur, Kantoni i Cyrihut.

Prokuroria Federale ka ardhur në përfundimin se shtetasja zvicerane së bashku me fëmijën atëbotë 4 vjeçar, në dhjetor të vitit 2015 kishte dashur të udhëtonte përmes Turqisë për në Siri, transmeton albinfo.ch. Atë e kishin ndaluar autoritetet greke ndërsa pas kthimit në Zvicër, ajo ishte arrestuar pasi që konsiderohej se në Siri ajo do t`i bashkohej organizatës terroriste ISIS.