Pakoja e re fiskale e pafavorshme për bizneset

Pakoja e re fiskale që pritet të hyjë në fuqi në janarin e 2012-s nuk ofron lehtësirat e plota të kërkuara nga komuniteti i biznesit.

Përfaqësuesit e këtij komuniteti kanë dhënë vërejtjet e tyre për politikat e reja fiskale të hartuara nga Qeveria, duke e cilësuar pakon si të “zbehtë” për sa i përket ndikimit në operimin e bizneseve dhe kritereve për rritjen ekonomike të paralajmëruar nga Qeveria.

Në pranverë Qeveria pati prezantuar një plan që i vihej barrë komunitetit të biznesit dhe i cili parasheh rritjen ekonomike të vendit ndërmjet viteve 2011-2014 në normën prej 7 deri në 8 për qind, shkruan Koha Ditore.

Plani i hartuar në pranverë, sipas përfaqësuesve të biznesit, është i paarritshëm në bazë të reformave të fundit të bëra nga kabineti qeveritar.

Lekë Musa, drejtor i Odës Ekonomike Amerikane në Kosovë, ka theksuar se duke e pasur parasysh kohën e prezantimit të reformave është tejet ambicioz nga ana e Qeverisë që të planifikohet rritje ekonomike prej 7 deri në 8 për qind.

Ai ka deklaruar se kur kësaj gjendjeje i shtohet edhe jostabiliteti politik i vendit dhe dështimi në tërheqjen e investitorëve të huaj, atëherë kjo normë e rritjes ekonomike, sipas tij, është vështirë e arritshme.

Sekretari i përgjithshëm i Odës Ekonomike të Kosovës, Berat Rukiqi, ka vlerësuar se pakoja e fundit fiskale e prezantuar nga Qeveria nuk është e plotë.

Sipas tij, deri në fund të vitit pritet që të prezantohet edhe një pako shtesë fiskale e cila parasheh ndryshime të normave tatimore për produktet esenciale.

Përfaqësues të Aleancës Kosovare të Bizneseve kanë vlerësuar se pakoja e re nuk e lehtëson punën e bizneseve.

Sipas tyre, politikat qeveritare të aplikuara ndaj bizneseve në përgjithësi janë të pafavorshme.