Panucci në telashe, edhe 2 futbollistë nuk mund t’u bashkohen kuqezinjve

Në bazë të rregullores së FIFA-s, klubet duhet të njoftoheshin 14 ditë para dhe si pasojë kanë refuzuar ftesat e dërguara në minutat e fundit

Pas ndryshimeve që ndodhën në listën e Kombëtares shqiptare, stafi teknik mendoi të grumbullonte mesfushorin Keidi Bara si dhe sulmuesin Rey Manaj.

Të dy këta futbollistë aktivizohen në Ligën e dytë spanjolle. Mësohet se klubi i Malagës dhe ai i Albacetes i refuzuan ftesën Shqipërisë, duke mos lejuar që futbollistët t’i bashkohen Kombëtares së Christian Panuccit, raportojnë mediat shqiptare.

Në bazë të rregullores së FIFA-s, klubet duhet të njoftoheshin 14 ditë para dhe si pasojë kanë refuzuar ftesat e dërguara në minutat e fundit, përcjell albinfo.ch.

Kujtojmë se në Ligën e dytë spanjolle vazhdon kampionati edhe në periudhën e kombëtarëve. Si Bare, ashtu dhe Manaj janë të rëndësishëm në klubet e tyre, duke u aktivizuar në shumicën e ndeshjeve si titullarë, shkruan “Panorama”.

Dje ftesën e ka refuzuar edhe Ermir Lenjani, i cili është arsyetuar se derisa të jetë Panucci trajner, ai nuk do të kthehet në Kombëtare, pasi meriton më shumë respekt.

---