Papa Françesku humb durimin: godet në duar gruan e bezdisshme

Siç mund të shihet në xhirim, ai e tërhoqi krahun nga shtrëngimi i gruas dhe madje e goditi disa herë me shuplakë në duar gruan në fjalë

Në përshëndetjen tradicionale të Natës së Vitit të Ri (Shën Silvestrit) në sheshin e Shën Pjetrit, në Vatikan, Papa Françesku është përballur me një situatë të pakëndshme. Shumë besimtarë kishin ardhur për të përshëndetur Papën nga afërsia, ndërsa vetë Papa pranonte me mirësi edhe prekjet e tyre në duar, shkruan albinfo.ch.

Por, në mesin e grumbullit  ishte edhe një grua, e cila , duke u ndier mbase e pavërejtur nga Papa, e kapi atë fuqishëm nga duart, duke i shkaktuar atij një bezdi të dukshme. Aq të dukshme sa që Papa i urtë u detyrua të tregojë se është vetëm njeri, sikur të gjithë ne, të tjerët, shkruan albinfo.ch. Siç mund të shihet në xhirim, ai e tërhoqi krahun nga shtrëngimi i gruas dhe madje e goditi disa herë me shuplakë në duar gruan në fjalë.

Siç ka shkruar gazeta italiane “Il Messagero”, Papa Françesku ka kërkuar falje për reagimin e tij nervoz. “Nganjëherë ne humbim durimin. Unë po ashtu. Kërkoj falje për shembullin e keq të djeshëm”.

---