Parlamenti heq ndalesën e punës për mjekët e huaj

Aktualisht ekziston një ndalim provizor i cili funksionon ashtu që kur «në treg» të ketë së tepërmi mjekë të një drejtimi, kantonet kanë të drejtë t`ua mohojnë atyre ushtrimin e proofesionit

Ndalimi i mjekëve të huaj për të ushtruar profesionin e tyre në Zvicër, i cili ishte vendosur  disa vite më parë, do të tërhiqet. Për këtë ka vendosur përfundimisht të premten Dhoma Nacionale e Parlamentit të Zvicrës, me një shumicë shumë të ngushtë votash, gjegjësisht 97 pro dhe 96 kundër, shkruan srf.ch.

Më parë, në përbërjen e vjetër, të dy dhomat e parlamentit ishin shprehur për vazhdimin e ndalimit të mjekëve të huaj për të ushtruar në mënyrë të pakufizuar të drejtën e punës në profesionin e tyre. Pikërisht ndryshimi i përbërjes në legjislaturën e re të parlamentit (dominimi i partive të djathta) ka mundësuar votimin e papritur.

Sipas rregullimit të deritashëm, ekziston një ndalim provizor i cili funksionon ashtu që kur «në treg» të ketë së tepërmi mjekë të një drejtimi, kantonet kanë të drejtë t`ua mohojnë atyre ushtrimin e proofesionit. Nga mesi i vitit të ardhshëm ky rregull nuk do të zbatohet më. Ndërsa me ndryshimin e ligjit, të kërkuar, do të duhej që ndalimi në fjalë, nga një masë e përkohshme të bëhej e përhershme dhe e mbështetur në ligj.

Se cili është efekti i mungesës së ndalimit, ka treguar rasti i vitit 2012, kur qe bërë një pezullim i përkohshëm i ndalimit në fjalë. Gjatë atij viti në Zvicër ishin vendsour dyfish më shumë mjekë të huaj se një vit më parë, ndërsa në Kantonin e Ticinos numri i lejeve të punës për mjekët e huaj madje ishte katërfishuar. Për këtë arsye parlamenti në vitin 2013 kishte aktivizuar «frerët emergjentë» për të ndaluar këtë invazion. Ndalesa në fjalë do të përfundonte në fund të qershorit të vitit që vjen.