Parlamenti i Zvicrës, kundër iniciativës për ndalimin e burkas

Pas një debati të nxehtë, Parlamenti Zviceran ka votuar me shumicë kundër iniciativës për ndalimin e mbulesës së fytyrës të grave myslimane

Të mërkurën, parlamenti zviceran  me 11r4 vota për,  76 kundër dhe 3 abstenime, ka rekomanduar refuzimin e iniciativës së bërë nga politikanë konservatorë që kërkojnë ndalimin e mbulesës së fytyrës ose tërë trupit, të grave myslimane, shkruan  sda.ch.

Votimi është kundër një referendumi të ardhshëm që do të mbahet lidhur me këtë iniciativë, transmeton albinfo.ch.

“Në letër” bëhet fjalë për një ndalim të përgjithshëm të mbulimit të fytyrës, përfshirë edhe atë të huliganëve në lojëra futbolli, por SVP konservatore e krahut të djathtë nuk e fsheh faktin se bëhet fjalë për ndalim të mbulesës së grave myslimane, të njohur si burka ose nikab.

“Ashtu si minarja, edhe mbulesa e plotë është një simbol i një islami ekstrem që nuk ka çfarë të kërkojë këtu,” ka thënë deputeti i SVP Walter Wobmann, përcjell albinfo.ch. Wobmann është president i Komitetit të Egerkingenit, i cili qëndron mbrapa iniciativës.

Ky komitet kishte pasur sukses në vitin 2009 me një referendum për të ndaluar ndërtimin e minareve në Zvicër.

Sipas socialdemokrates Sandra Locher, në Zvicër mund të ketë jo më shumë se një duzinë grashë të veshura me burka ose nikab. Me këtë ajo ka dashur të tregojë se iniciativa si e tillë, nuk ka të bëjë shumë me realitetin në terren.

“Burkat janë një shenjë e izolimit dhe inferioritetit midis grave,” ka thënë deputetja e SVP Barbara Steinemann. Ndërkaq zëdhënësja e socialdemokratëve, Samira Marti është shprehur e befasuar që SVP “befas u bë një forcë e madhe emancipimi”.

“SVP po instrumentalizon barazinë e grave për qëllimin e saj”, ka thënë Isabelle Pasquier-Eichenberger nga Partia e Gjelbër.

Qeveria gjithashtu ka hedhur poshtë iniciativën, transmeton albinfo.ch. Ndalime të tilla bien në kompetencën e kantoneve, sipas qeverisë. Disa nga kantonet (Ticino dhe St.Gallen)  tashmë kanë ndaluar burkën.

Por, edhe qeveria në kundërpropozimin  e saj kërkon që të gjithë pa përjashtim, pra edhe gratë e mbuluara, në raport me autoritetet e shtetit, të jenë të detyruar të tregojnë fytyrën për identifikim.

Me dorëzimin e më shumë se 100,000 nënshkrimeve të vlefshme, Komiteti Egerkingen ka plotësuar tashmë kriteret për të organizuar referendumin. Por ende nuk ka datë të caktuar për mbajtjen e tij.

---