Pas largimit të ASH-së, në koalicion me Zevin pritet të hyj PDSH

Bisedimet pritet të vazhdojnë edhe pas festave të fundvitit, ndërsa mendohet se PDSH do t’i marr favoret e njëjta që i ka pasur ASH

Pas vendimit të Aleancës për Shqiptarët për të dal nga koalicioni me partinë e kryeministrit Zoran Zaev (LSDM), është partia tjetër nga Tetova –  Partia Demokratike Shqiptare që ka shpejtuar hapat për të hyrë në negociata me partinë qeverisëse. Bisedimet pritet të vazhdojnë edhe pas festave të fundvitit, ndërsa mendohet se PDSH do t’i marr favoret e njëjta që i ka pasur ASH.

Sipas informatave të para, partisë së Menduh Thaçit do të mund t’i ofroheshin ministria e Shëndetësisë e cila tanimë ka kaluar në duart e LSDM-së.

Aleanca e Ziadin Selës, madje gjatë seancës së sotme plenare të Kuvendit, është listuar si parti opozitare, pas vendimit të kreut të saj Ziadin Sela se nuk janë më pjesë e Qeverisë. A po i hapen dyert për në Qeveri me këtë partisë së Thaçit, pritet të shihet ditët në vazhdim.

PDSH, vazhdimisht është duke rënë në rezultat që nga zgjedhjet e vitit 2008 dhe një inkuadrim eventual i saj në Qeveri do të ishte mundësia e vetme për këtë subjekt politik ta rikuperon veten, citon albeu. Ndryshe, partia e Thaçit është edhe nënshkruese e Marrëveshjes së Përzhinos, ndërsa në vazhdimësi kanë paralajmëruar se do të mbështesin proceset reformuese dhe të rëndësishme për vendin.

Por, PDSH në zgjedhjet e fundit ka dëshmuar se ka mbetur partia e katër shqiptare në nivel vendi, duke u radhitur pas BDI-së, Lëvizjes Besa dhe ASH-së.