“Pasaporta e vaksinimit” mund t`ua “djegë” pushimet verore zviceranëve

Pasi duhet pritur dy javë, nëse doza e dytë e vaksinës nuk injektohet deri në korrik, pushimet e verës mund të jenë "djegur"

Të gjithë ata që vaksinohen në Zvicër marrin një certifikatë (“pasaportë”) vaksinimi. Mirëpo, siç merret vesh kjo do të lëshohet vetëm dy javë pas dozës së dytë të vaksinimit, shkruan Tages Anzeiger.

Kështu, bëse dëshironi të shkoni jashtë vendit me një çertifikatë vaksinimi gjatë pushimeve verore, do të ju duhet të keni durim, transmeton albinfo.ch.

Siç është premtuar nga qeveria, të gjithë ata që duan të vaksinohen, do të mund ta bëjnë këtë deri në fund të korrikut.  Atëherë, ata që do të kenë një certifikatë vaksinimi, duhet të jenë në gjendje të udhëtojnë pa problem jashtë vendit.

Por problemi është se kjo certifikatë vaksinimi do të jetë në dispozicion vetëm dy javë pas dozës së dytë të vaksinimit.

Kjo, për shkakun se vetëm pas kalimit të kësaj kohe dikush konsiderohet plotësisht i vaksinuar, konfirmon Zyra Federale e Shëndetit Publik BAG  për  gazetën “Tages-Anzeiger”.

Me fjalë të tjera, nëse doza e dytë e vaksinës nuk injektohet deri në korrik, pushimet e verës mund të jenë “djegur” tashmë, përcjell albinfo.ch. Kjo mund të ndodhë, kur dihet se në shumë vende të Zvicrës, pushimet shkollore mbarojnë në mes të gushtit.

---