Për 20 ditë, policia e trafikut gjobitë 15 mijë kosovarë

Në bazë të rregullave të reja të komunikacionit, 14,230 persona janë dënuar deri në 500 euro, njofton Policia e Kosovës. Në gjashtë raste Policia ka shqiptuar gjoba deri në 1000 euro

Foto ilustrim

Që nga fillimi i këtij muaji, Policia e Kosovës ka shqiptuar mbi 15 mijë gjoba në komunikacion, në bazë të një plani organizativ për të parandaluar aksidentet në trafik. Sipas informacioneve nga policia, në bazë të rregullave të reja të komunikacionit, 14,230 persona janë dënuar deri në 500 euro.

Në gjashtë raste policia ka shqiptuar gjoba deri në 1000 euro, ndërkohë që në 856 raste shkelësit e rregullave të komunikacionit Policia i ka dërguar në gjykatë, transmeton REL.

Policia thotë se 214 personave i u është ndaluar drejtimi i automjeteve. Mbi 500 ngasës kanë pësuar nga heqja e pikëve pasi ata kishin shkelur rregullat e parapara me ligjin për trafik.

“Qëllimi ynë për zbatimin e ligjit të ri për trafikun rrugor është krijimi i një sigurie më të madhe në trafik…Ne kemi parë se vitin e kaluar janë rritur aksidentet me fatalitet, andaj kemi marrë masa për ta ndryshuar situatën”, ka thënë zëdhënësi i Policisë së Kosovës Daut Hoxha, sipas të cilit, gjobat do t’i shkruhen secilit person që thyen rregullat në komunikacion.