Për tri vjet, Kushtetuta rrëzoi dy presidentë

Kushtetuta ka mbushur sot tri vjet. Për shkelje të saj janë larguar nga posti i presidentit - Fatmir Sejdiu dhe Behgjet Pacolli

Gjatë këtyre tri vjetëve, akti më i lartë juridik i vendit është sfiduar nga institucionet kryesore të shtetit më të ri në botë.

Gjykata Kushtetuese ka trajtuar dhjetëra raste të pretenduara për shkelje të Kushtetutës. Rasti më i rëndë ka qenë ai i vitit të kaluar për presidentin Fatmir Sejdiu, për të cilin kjo gjykatë konstatoi se e ka shkelur Kushtetutën duke mbajtur njëkohësisht dy poste – kryetar i LDK-së dhe president vendi.

Por edhe vetë Kuvendi, si institucion që e ka miratuar Kushtetutën, e ka shkelur atë në rastin e zgjedhjes së Behgjet Pacollit, president të vendit, më 22 shkurt të këtij viti.

Ky ishte konstatimi i fundit i Gjykatës Kushtetuese. Zhvillimet që pasuan pas konstatimit të shkeljeve të Kushtetutës, kanë nxitur nevojën për të filluar ndryshimin e saj.

Në bazë të marrëveshjes së javës së kaluar, pritet që të ndryshohet Kushtetuta, në pjesën që ka të bëjë me zgjedhjen e presidentit.

Pos institucioneve vendore për shkelje të Kushtetutës akuzohet edhe misioni i EULEX-it. Zyrtarë të institucioneve të Kosovës e kanë akuzuar këtë mision se ka shkelur Kushtetutën në rastin e ngritjes së fletarrestit për deputetin Fatmir Limaj, por Gjykata Kushtetuese ende nuk është deklaruar për këtë çështje.

Zbatimi i Kushtetutës nuk ka filluar ende në pjesën veriore të Kosovës për shkak të refuzimit të banorëve serbë të kësaj pjese.

Ndryshe më 9 prill të vitit 2008, në një seancë solemne 107 deputetët e pranishëm nga 120, sa ka Kuvendi, me aklamacion e kanë miratuar Kushtetutën e Republikës së Kosovës. Kushtetuta bazohet kryesisht në Pakon e Martti Ahtisaarit. Ajo hyri në fuqi më 15 qershor të vitit 2008, ndërsa hartimin e saj a ka bërë Komisioni kushtetues, që kishte 18 anëtarë dhe kryesohej nga Hajredin Kuçi.

Paraprakisht për Kushtetutën brenda një kohe të shkurtër janë mbajtur debate me qytetarë, mirëpo edhe pse kishte shumë vërejte pak ndryshime janë bërë, pasi ajo nuk mund të devijonte nga përcaktimet e vëna në Pakon e Ahtisaarit.