Përfituesit nga Kosova të bursës “Swiss Excellence” festojnë suksesin në një mbrëmje të veçantë

Një mbrëmje festive është organizuar në nder të bursës “Swiss Excellence” dhe komunitetit të studiuesve nga Kosova që kanë qenë pjesë e këtij programi. Ngjarja mblodhi bashkë përfitues aktualë dhe ish-përfitues të bursës, duke vënë në pah rrugëtimin e tyre akademik dhe profesional, njofton ambasada e Zvicrës në Kosovë, transmeton albinfo.ch.

Pjesëmarrësit ndanë përvojat e tyre dhe theksuan rëndësinë që ka pasur bursa në zhvillimin e tyre si studiues, kërkues dhe profesionistë. Programi “Swiss Excellence” shihet si më shumë se një mbështetje financiare, ai është konsideruar një platformë që krijon ura bashkëpunimi, mundësi të reja dhe lidhje ndërkombëtare.

Në fokus të mbrëmjes ishte rritja e komunitetit të studiuesve nga Kosova dhe ndikimi pozitiv që ata kanë pasur në fushat përkatëse të studimit. Organizatorët shprehën mirënjohje për përfaqësimin dinjitoz që këta studiues i kanë dhënë vlerave të ekselencës akademike.

Ndërkohë, është paralajmëruar se thirrja për aplikime në bursën “Swiss Excellence” për vitin akademik 2026–2027 do të hapet së shpejti. Kandidatët e interesuar ftohen të qëndrojnë të informuar për detajet dhe kriteret përmes kanaleve zyrtare.