Përfundimisht super ekspertiza e Astrit Deharit do të bëhet në Zvicër

Tashmë është edhe zyrtare. Ekspertiza për vdekjen e Astrit Deharit do të kryhet në Zvicër. Prokuroria e Shtetit i është përgjigjur pozitivisht kërkesës së familjes Dehari, e cila kishte zgjedhur që ekspertizën ta bëjë Qendra Universitare e Mjekësisë Ligjore në Lozanë të Zvicrës.

Zyrtarë për media të Prokurorisë kanë konfirmuar për KTV-në se Prokuroria është duke i përgatitur të gjitha dokumentet e nevojshme për t’i dërguar për super ekspertizë në shtetin e Zvicrës, ashtu siç ka kërkuar familja Dehari, përcjell albinfo.ch.

Përbërja e kaluar e Kuvendit të Kosovës kishte miratuar si rekomandim rezolutën e propozuar, sipas së cilës, ekspertiza do të kryhej në një vend të BE-së ose në SHBA. Qeveria e kaluar e refuzoi kërkesën, duke thënë se Zvicra nuk është vend i BE-së.

Ministri aktual i drejtësisë, Abelard Tahiri, është shprehur se ka kryer anën ligjore dhe prandaj ai i ka dorëzuar të gjitha shkresat e nevojshme te kryeprokurori.

Tahiri thotë se për këtë, ai dhe kryeministri Ramush Haradinaj janë takuar edhe me ambasadorin e Zvicrës në Kosovë, për të marrë garanci për institutin e zgjedhur nga familja Dehari.

Kujtojmë që Astrit Dehari kishte ndërruar jetë në nëntorin e vitit 2016, derisa vdekja e tij ngjalli shumë reagime, pasi familja dhe Lëvizja Vetëvendosje thonë se ai nuk ka bërë vetëvrasje, derisa të kundërtën e kanë thënë institucionet ligjore të Kosovës.