Përfundon më në fund rinumërimi, vendoset fati i NISMA-AKR-së

Rezultatet përfundimtare pritet të publikohen nesër gjatë ditës

Ka përfunduar procesi i rinumërimit të 1, 407 vendvotimeve, për të cilat ka vendosur PZAP-i.

Zëdhënësi i KQZ-së, Valmir Elezi, tha se para certifikimit të zgjedhjeve do të marrin konfirmimin nga PZAP-i dhe Gjykata Supreme.

Elezi tha se brenda 24 orëve mund ta paraqiten ankesat në PZAP, ndërsa publikimi i rezultateve në faqen e KQZ-së pritet të bëhet më së largu ditën e nesërme.

“Tash ka përfunduar rinumërimi i 1407 vendvotimeve. Falënderojmë të gjithë zyrtarët e numërimit që me përkushtim kanë punuar në përmbylljen e këtij procesi. Sot është dita e 12-të e rinumërimit që nga vendimi i PZAP-it. Para se KQZ të bëjë certifikimin e rezultatit të zgjedhjeve, merr konfirmimin nga PZAP dhe Gjykata Supreme që nuk ka ndonjë çështje që është në shqyrtim. Rezultatet pas këtij procesi do të publikohen në web-faqen e KQZ-së”, ka thënë ai, raporton Ekonomia Online, përcjell albinfo.ch.

Ai tutje ka shtuar se deri nesër do të mund të bëhen publike rezultatet e këtij rinumërimi.

Elezi tha ende nuk dihet nëse e ka kaluar pragun Nisma, pasi ende nuk i kanë rezultatet.

“Pas përfundimit të rinumërimit, subjektet politike kanë të drejtë ankese lidhur me administrimin në QNR”,  tha Elezi.

Komisioni Qendror i Zgjedhjeve para certifikimit të rezultatit përfundimtar merr konfirmimin nga PZAP dhe nga Gjykata Supreme se nuk ka ndonjë çështje në zhvillim.

Edhe pse nuk janë shpallur rezultatet përfundimtare, mediat kosovare raportojnë se koalicioni NISMA-AKR ka kaluar pragun dhe do të jetë pjesë e Kuvendit të Kosovës.

---