Përgjysmim i rasteve të ekstremizmit islamik në ushtrinë e Zvicrës

Në vitin 2017 është shënuar për herë të parë pas disa vitesh (nga viti 2013) ulje e numrit të paraqitjeve ekstremiste me motive xhihadiste

Këshillimorja profesionale për ekstremizmin në kuadrin e Ushtrisë zvicerane gjatë vitit të kaluar ka regjistruar 42 raste të paraqitjeve ekstremiste në mesin shërbyesve ushtarakë.

Siç bën të ditur Ministria e Mbrojtjes (VBS), në vitin 2017 është shënuar për herë të parë pas disa vitesh (nga viti 2013) ulje e numrit të paraqitjeve ekstremiste me motive xhihadiste, shkruan albinfo.ch duke iu referuar një komunikate të Ministrisë së Mbrojtjes.

Ndërsa në krahasim me një vit më parë, me vitin 2016 bëhet fjalë për një përgjysmim të rasteve në fjalë. Gjithsej janë regjistruar tetë (8) raste të ekstremizmit islamik në ushtri.

Gjithashtu, këshillimorja në fjalë bën me dije se gjatë kësaj periudhe nuk ka pasur raste që do të kishin rrezikuar sigurinë. Megjithatë, numri i përgjithshëm i rasteve të regjistruara gjatë vitit 2017 ka qenë pak më i madh se gjatë viteve të kaluara.