Përkujtohen martirët e masakrës së Krushës

Në 19-vjetorin e Betejës së Landovicës dhe masakrës në Krushë të vogël janë bërë homazhe në Varrezat e Dëshmoreve dhe martirëve në Landovicë. Presidenti i Kosovës, Hashim Thaçi ka kujtuar masakrat e kryera nga forcat serbe në Kosovë, përcjell albinfo.ch.

Ai ka vlerësuar se muaji mars sjell në kujtesë lavdinë e luftës së drejtë, por edhe ditët e rënda nëpër të cilat vendi ka kaluar, si dhe humbjen e njerëzve. Edhe kryeministri Ramush Haradinaj ka përkujtuar dëshmorët e masakrës së Krushës së Vogël dhe Krushës së Madhe dhe flijimin e familjes Berisha në Suharekë, familjes Bogujevci në Podujevë e familjes Mirena. “Sot kujtojmë aktin çnjerëzor mbi një popullatë të tërë të pafajshme. Fëmijë, pleq, gra e burra të pambrojtur u bënë cak i terrorit të regjimit serb. Ndër breza do të kujtohen të gjithë martirët, nga gjaku i të cilëve u vendosen themelet e Kosovës së lirë”, ka thënë kryeministri Haradinaj.