Peticion kundërshtimi për marrëveshjen tregtare Zvicër-Mercosur

Ilustrim

Një peticion prej 65 mijë nënshkrimeve është dorëzuar në autoritetet federale në Bern duke kërkuar anulimin, ose rishikimin e marrëveshjes tregtare midis EFTA-së pjesë e së cilës është edhe Zvicra dhe bllokut të tregtisë Mercosur.

Peticioni i titulluar “Asnjë marrëveshje e tregtisë së lirë midis Zvicrës dhe shkatërruesit të Amazonës Bolsonaro” kërkon që Berna të heqë dorë nga nënshkrimi i një marrëveshje të shpallur së fundmi nga EFTA me Mercosur.

Ky peticion u organizua nga Campax, një OJQ  e cila shërben për “një shoqëri solidare, një ekonomi të qëndrueshme dhe një mjedis të paprekur”.

Campax tha se 65 mijë nënshkrime u mblodhën në më pak se një javë.

Duke bërë jehonë shqetësimet e fermerëve zviceranë të shprehur disa ditë më parë, Campax shkruan se marrëveshja “do të rrisë eksportet braziliane të viçit dhe sojës dhe kështu do të promovojë shpyllëzimin”.

“Nuk është e papërgjegjshme vetëm ekologjikisht dhe etikisht por, e papërgjegjshme është të lidhësh një marrëveshje të tregtisë së lirë me [presidentin brazilian] Bolsonaro – nuk ka as kuptim ekonomik,” shkruan grupi Compax.

Campax argumenton se nënshkrimi i marrëveshjes do të inkurajonte zakonet shkatërruese të administratës së presidentit Bolsonaro në pyjet e Amazonës dhe të çonte në një ngrohje më globale, pasojat e së cilës janë shumë më të mëdha për Zvicrën sesa që mund të ketë përfitime të tregtisë afatshkurtra, përcjell Albinfo.ch.