Pierre Maudet, kandidat serioz për të zënë vendin e ministrit Burkhalter

Maudet, vetëm 39 vjeçar gëzon popullaritet të madh në Gjenevë dhe në partinë që përfaqëson, shkruan albinfo.ch. Si i tillë, ai mund ta rrezikojë seriozisht kandidatin e vetëm deri tash të zyrtarizuar, Ignazio Cassis nga Kantoni i Tiçinos

Pierre Maudet

Ministër në Qeverinë e Kantonit të Gjenevës, politikani nga FDP/PLR, Pierre Maudet është kandidati i radhës për të zënë vendin vakant të ministrit më Qeverinë Federale të Zvicrës, pas dorëheqjes së ministrit Burkhalter. Maudet, vetëm 39 vjeçar gëzon popullaritet të madh në Gjenevë dhe në partinë që përfaqëson, shkruan albinfo.ch. Si i tillë, ai mund ta rrezikojë seriozisht kandidatin e vetëm deri tash të zyrtarizuar, Ignazio Cassis nga Kantoni i Tiçinos.

FDP e Gjenevës e ka pritur mirë këtë kandidim dhe u ka rekomanduar delegatëve që ta mbështesin atë më 8 gusht kur mbahet në Gjenevë kuvendi i partisë, raportojnë mediat zvicerane.

Vetëm një ditë më parë kishte hequr dorë nga kandidatura, kolegu i tij, nënkryetari i FDP/PLR-së së Gjenevës, Christian Lüscher, duke e lënë të lirë shtegun për kandidatin e ri.

Kantoni i Gjenevës nuk ka pasur përfaqësues në Këshillin Federal që nga dorëheqja e Micheline Calmy Rey, në vitin 2011.

Më parë, FDP e Kantonit Vaud kishte kumtuar se do të kandidonte dy kandidate për postin në fjalë: Jacqueline de Quattro dhe Isabelle Moret.

Zgjedhja e pasuesit të Burkhalterit do të bëhet më 20 shtator në asamblenë e përgjithshme të të dy dhomave të Parlamentit të Zvicrës.