Plani Ahtisaari, platformë e mirë

Tensionimet në veri dhe refuzimi i serbëve të kësaj pjese që të integrohen në sistemin kushtetues të Kosovës kanë ngritur dilema për zbatueshmërinë e Pakos së Ahtisaarit.

Kjo pako nga analistët e Prishtinës dhe Beogradi konsiderohet si platforma më e mirë për integrimin e komunitetit serb në të dyja anët e Ibrit.

Njohës të rrethanave politike në Kosovë dhe Serbi kanë vlerësuar se dispozitat e këtij plani janë hartuar në përputhje me standardet më të larta ndërkombëtare për mbrojtjen e të drejtave të komuniteteve.

Prandaj dhe çfarëdo formule për integrimin e veriut, por edhe për normalizimin e raporteve Kosovë-Serbi do të ndërtohen mbi këto parime, shkruan Koha Ditore.

Ata janë të bindur se faktori ndërkombëtar do të kërkojë një zgjidhje të ndërmjetme duke i shtuar kompetencat për veriun përtej propozimeve të Ahtisaarit, por në kuadër të sistemit kushtetues të Kosovës.