Pllakati me ndalimin e shqipes, “një shaka në mes kolegëve të punës”

Sqarohet pothuajse gjithçka në lidhje me pllakatin për «ndalimin e shqipes» ne një zyrë zvicerane, i cili gjatë fundjavës së fundit kishte bërë xhiro të madhe në mediet sociale shqiptare dhe zvicerane.

Fotografia paraqiste një zyrë të paidentifikuar, në të cilën ishte varur një pllakat i madh ku përmes figurave tërhiqej vërejtja se të punësuarve aty u ndalohej të flasin në gjuhën shqipe ndërsa lejohej vetëm gjuha gjermane.

Në postimin e publikuar në medie të shumta mungonte çfarëdo e dhëne lidhur me vendin ose autorësinë e këtij postimi, transmeton albinfo.ch.

Portali 20min.ch, i cili e kishte publikuar i pari këtë fotografi në hapësirën gjermane, kishte kërkuar nga lexuesit që të sillnin informacione që do të ndihmonin në identifikimin dhe lokalizimin e kësaj zyre.

Ndërkohë një person është paraqitur dhe pohon se ai është i pari që e ka publikuar këtë fotografi, përcjell albinfo.ch. Ai punon në firmën që duket në fotografi dhe është vetë me prejardhje shqiptare.

Fillimisht e gjithë kjo kishte lindur si «një shaka në mes të kolegëve të punës». Por, fakti se fotografia e tij ka bërë kaq shumë bujë në mediet elektronike në Kosovë dhe Shqipëri është i pakëndshëm për të. Kjo për arsyen se ajo ka ngjallur shumë pakënaqësi dhe mllef ndër shqiptarët e atjeshëm. Sikur ta kishte ditur se kjo fotografi do të ngjallte reaksione të tilla, ai nuk do ta postonte atë kurrë.

«Në firmën tonë nuk ka ndalim të shqipes», ka thënë ai për 20 min.ch. Dhe ai nuk ka pasur për qëllim të krijojë përshtypjen se shqiptarët janë të diskriminuar nga punëdhënësi i tij. Por, pas kësaj që ka ndodhur, ai tash ka frikë edhe për vendin vet.