Po zhvillon punimet konferenca shkencore e LSHB-së dhe ABSM-së për sfidat e mileniumit

Në këtë konferencë që po vazhdon në këto momente, po marrin pjesë një numër studiuesish dhe veprimtarësh të shquar nga të gjitha hapësirat shqiptare dhe nga diaspora

Lidhja Shqiptare në Botë dhe ABSM Basel, në 25-vjetorin e themelimit të tyre po organizojnë një konferencë shkencore me temën “Sfidat shqiptare të mileniumit të ri”. Në këtë konferencë që po vazhdon në këto momente, po marrin pjesë një numër studiuesish dhe veprimtarësh të shquar nga të gjitha hapësirat shqiptare dhe nga diaspora, Albinfo.ch është sponsor medial i aktivitetit.

Kryetari i LSHB-së, Nazmi Jakurti, ka përshëndetur të pranishmit, duke bërë një rezyme rreth punës 25-vjeçare të subjektit që drejton. Një përshëndetje të veçantë ai i ka drejtuar themeluesit të LSHB-së dhe kryetarit të nderit, Simon Kuzhnini, i cili ka ardhur enkas nga Zagrebi.

Edhe kryetari i ABSM-së, Skender Nikoliqi, ka përshëndetur tubimin dhe së bashku ka shpallur të hapur konferencën.

Në seancën e paradites, me referimet e tyre u paraqitën: Lazim Destani, afarist dhe veprimtar i njohur, Dr. Bashkim Iseni, profesor universitar, përgjegjës për integrimin në qytetin e Lozanës, themelues i platformës mediale albinfo.ch, Jeta Xharra, gazetare e njohur, udhëheqëse e BIRN Kosova, Driton Kajtazi, kryetar i ISEAL dhe mësimdhënës liceu në Lozanë, Prof. Dr. Rudina Jasini dhe Prof. Dr. Shyqri Nimani

Konferenca po vazhdon punimet në seancën e saj të pasdites. Albinfo.ch do të bëjë një raportim më të gjerë rreth aktivitetit, në orët e mëvonshme të ditës së sotme.

---