“Pogragja” e Cyrihut, shembull si ndihmohet nga diaspora

Kryetari Haziri vlerësoi se shoqata “Pogragja” është shembull i mirë që bashkatdhetarët tanë nga Zvicra ndihmojnë vendlindjen e tyre, përkatësisht fshatin e tyre

Kryetari i Komunës së Gjilanit, Lutfi Haziri, ka pritur në një takim përfaqësuesit e shoqatës “Pogragja” me seli në Cyrih të Zvicrës, të cilët i ka falënderuar për punën e madhe që po e bëjnë për fshatin e tyre.

Haziri vlerësoi se shoqata “Pogragja” është shembull i mirë që bashkatdhetarët tanë nga Zvicra ndihmojnë vendlindjen e tyre, përkatësisht fshatin e tyre, thuhet në faqen zyrtare të Komunës së Gjilanit.

“Ju falënderoj shumë për kontributin dhe punën tuaj të mrekullueshme që po e bëni si shoqatë për vendlindjen. Ju jeni shembull i mirë i bashkatdhetarëve nga Zvicra, të cilët ndihmojnë vendlindjen e tyre, përkatësisht fshatin e tyre, duke i dedikuar një pjesë të mjeteve financiare për vendlindjen. Po e përsëris që mërgimtarët tanë kudo në botë janë vlerë jona kombëtare”, tha Haziri.

Ndërkaq, Agron Aliu, përfaqësues i shoqatës “Pogragja” me seli në Cyrih, pasi ka falënderuar kryetarin Haziri për pritjen miqësore, ka shprehur zotimin se do të vazhdojnë të kontribuojnë për fshatin e tyre edhe në të ardhmen.