Policia e Maqedonisë përdor gaz lotsjellës kundër refugjatëve

Policia e Maqedonisë përdori gazin lotsjellës për ta shpërndarë turmën e refugjatëve afro-aziatikë që vërshuan kufirin në përpjekje për të depërtuar me dhunë në Maqedoni

Gjendja e sigurisë në kufirin ndërmjet Maqedonisë dhe Greqisë ka dalë jashtë kontrollit pasi një grup i refugjatëve afro-aziatikë, që ishin të ngujuar në zënën e askujt, tentuan të hyjnë dhunshëm në Republikën e Maqedonisë. Për t’i parandaluar ata, Policia maqedonase përdori gazin lotsjellës.

Situata u rëndua kur refugjatët e ngujuar në anën greke, shkulën portën e hekurt të përforcuar me tela me gjemba mes dy vendeve.

Ndërkaq qindra të tjerë u ulën në binarët e hekurudhës duke refuzuar të çoheshin derisa t’iu lejohet të kalojnë kufirin. Besohet se në kampin në Idomeni, që paraqet pikën kryesore të tranzitimit të refugjatëve, janë grumbulluar rreth 8 mijë persona edhe pse ky kamp ka kapacitet për vetëm 2500.

Nga ana tjetër, qindra aktivistë protestuan në Athinë përpara ambasadës austriake. Ata i bërë thirrje Vjenës t’i hapë portat për emigrantët, raporton AlsatM. Një ditë më parë shefat e policive të Austrisë, Sllovenisë, Maqedonisë, Serbisë dhe Kroacisë ranë dakord që të kufizojnë valën e refugjatëve duke lejuar kalimin e vetëm 580 persona në ditë.

Por, ky vendim i shteteve anëtare u kritikua ashpër nga kancelarja gjermane Angela Merkel. Evropa nuk mund ta lejojë zhytjen e Greqisë në kaos, ka theksuar Merkel duke shtuar se Shtetet e BE-së nuk luftuan aq fort për ta mbajtur Athinën në zonën e euros, vetëm që pastaj ta linin në baltë.

Derisa refugjatët nga Lindja e Mesme kanë bllokuar hekurudhën në  zonën kufitare midis Greqisë dhe Maqedonisë, Ushtria e Maqedonisë po ngre një gardh të ri me gjemba në kufij. Maqedonia nuk pranon më shumë se 300 refugjatë në ditë, të cilët pas pak orë qëndrimi në kampet e Gjevgjelisë dhe Tabanocit udhëtojnë drejt vendeve perëndimore. Agjencia e Kombeve të Bashkuara për Refugjatët thotë se kalimi i refugjatëve nëpër Maqedoni nuk duhet të paraqesë problem për vendin, përderisa ata nuk ndalen për një kohë më të gjatë këtu.