Policia e trafikut shton prezencën në rrugë për mërgimtarët

Policia e Kosovës

Ardhja e bashkatdhetarëve ka bërë që Policia e Kosovës, Njësia e trafikut,të shtojë prezencën nëpër rrugë.

Jeton Rexhepi, drejtor për Komunikacion Rrugor në Policinë e Kosovës, thotë se qëllim i policisë është komunikimi me mërgimtarët.

“Një prezencë e shtuar policore në rrugë është kërkuar, sidomos në zona urbane që të ketë qarkullim në këmbë. Po ashtu, patrullimi të bëhet në pika të kontrollimit, nga automjete civile e edhe me automjete me pajisje inteligjente që bëjnë kontroll dhe identifikim të kundërvajtësve”, ka thënë Rexhepi për Kohavision.

Tutje shton se duhet pasur kujdes në trafik, marrë parasysh rritjen e numrit të aksidenteve.

“Sa u përket gjobave, siç parashihet me ligj, policia pos pjesëve të parandalimit e sensibilizimit, e ka obligim edhe të marrë masa ndaj kundërvajtësve që ndodhën në trafik. Qëllimi i gjobave është disiplinimi i shkelësve. Ndryshimet ligjore kanë ndikuar që edhe gjobat të kenë efektet e tyre”, ka thënë ai, përcjell albinfo.ch.

Sipas Rexhepit, në gjashtëmujorin e parë të këtij viti, 4.116 vozitësve u është ndaluar vozitja, e mbi 12 mijë të tjerëve u janë shqiptuar pikë negative.