Policia flet për zyrtarin policor i cili dyshohet se përdhunoi Vasfije Krasniqin

Jo më larg se mbrëmë, një grua e cila ishte përdhunuar seksualisht gjatë kohës së luftës në Kosovë, rrëfeu përjetimet e saj, mediat mbushën hapësirat e tyre duke treguar ngjarjen se si kishte nisur e përfunduar.

Vasfije Kastrati, nga Vushtrria është një grua kosovare e cila ka vendosur që përdhunimin ndaj saj nga policia serbe në kohën e luftës në Kosovë, ta bëj publik dhe të mos shqetësohet për pjesën tjetër, atë të frikës së si do të ndihet pas publikimit të jetës së saj.

E larguar nga Kosova pasi që nuk shihte të ardhme dhe nuk duronte dot të qëndroj nga përjetimet që i kishte kaluar Vasfija tani është e martuar dhe ka dy vajza.

Në rrëfimin e saj, ku të pranishëm ishin shumë fytyra publike institucionale, Vasfija, një grua e fortë dhe me besim të plotë, rrëfen momentet e përdhunimit, shkruan Albinfo.ch.

Lidhur me rastin e saj, në media u publikuan disa fotografi nga ku thuhej se njëri nga policët serb që e përdhunoi Vasfijen ishte zyrtar policor në Policinë e Kosovës.
Lidhur me këtë rast, policia në disa deklarata dhënë mediave vendore ka sqaruar pozitën që kishte njëri nga të dyshuarit për përdhunimin e Vasfijes.

“Policia e Kosovës konfirmon se personi i apostrofuar; J. D. ka qenë i punësuar në PK nga data 12.02.2001 deri më 15.06.2017, kur edhe iu është shqiptuar masa Ndërprerje e marrëdhënies se punës ndërsa i apostrofuari; Gj. B. nuk është pjesëtar i PK-së”, ka thënë policia në një deklaratë.
Ish- zyrtari policor i PK-së, i dyshuar për përdhunimin e Vasfije Krasniqit, kishte punuar në PK për 16 vjet.

Vasfije Krasniqi, do të dëshmoj edhe në Hagë në lidhje me rastin e saj.