Policia italiane kthen këlyshët e vjedhur

Policia italiane këtë javë ka dëshmuar se askush nuk mund t’i ikë dorës së gjatë të ligjit, kur ka ribashkuar 6 këlyshë të vjedhur me nënën e tyre.

Policia arrestoi një 26-vjeçar, i cili vodhi këlyshët nga shtëpia e një gruaje në qytetin sicilian, Ragusa, përcjell albinfo.ch.

Të mërkurën, gruaja e paraqiti vjedhjen në polici dhe tha se 6 këlyshët e lindur vetëm pak javë më parë i janë vjedhur.  Një ditë më pas, policia bastisi banesën e të dyshuarit për vjedhje, i cili njihej për vepra kriminale dhe të cilin e njihte edhe gruaja që e paraqiti rastin, meqë i njëjti e kishte blerë një këlysh nga ajo para disa muajsh.

Hajduti mohoi se i kishte marrë këlyshët, por lehja e tyre e tradhtoi. Policia bastisi dhomën në banesë dhe i gjeti 6 këlyshët në një shportë. Këlyshët iu kthyen nënës e pronares.