Policia shpërndan protestën anti-G7 në Gjenevë pas dëmeve të shumta; përplasjet vazhdojnë

Foto sc

Të paktën 20.000 persona, sipas të dhënave të policisë, dhe “dhjetëra mijëra” sipas koalicionit G7, morën pjesë të dielën në protestën kundër samitit të G7, i cili nis të hënën në Evian.

Protestuesit u larguan nga Parku Mon Repos pak para orës 15:15 nën masa të rrepta sigurie. Më vonë, rreth orës 19:00, ata u kthyen në pikën e nisjes, ndërsa policia kishte urdhëruar shpërndarjen e demonstratës.

Rreth orës 16:30 u raportuan incidentet e para. Një makinë u dogj, ndërsa u shënuan përplasje mes protestuesve dhe policisë pranë stacionit hekurudhor Cornavin. Tensionet u përshkallëzuan rreth orës 18:00, kur marshimi arriti në zonën e Kombeve, ku policia përdori gaz lotsjellës. Gjatë rrugës u thyen disa dritare.

Presidenti i Konfederatës Zvicerane, Guy Parmelin, i ftuar në emisionin Forum, bëri thirrje për qetësi. Ai shprehu shpresën që demonstratat të zhvillohen “në mënyrë paqësore” dhe që “secili të ketë mundësi të shprehë mendimin e tij në mënyrën më të qetë të mundshme”, duke theksuar të drejtën kushtetuese për protestë.

Samiti që mbledh shtatë fuqitë kryesore ekonomike botërore (Gjermaninë, Kanadanë, Shtetet e Bashkuara, Francën, Italinë, Japoninë dhe Mbretërinë e Bashkuar) zhvillohet në Evian nga 15 deri më 17 qershor. Ndërprerje dhe tensione pritet të vijojnë deri më 19 qershor.