Policia thotë se kërcënimi ndaj Kurtit ka ardhur nga Serbia

Nga hetimet është konstatuar se postimi është realizuar nga Serbia gjegjësisht qyteti i Kralevës

Policia e Kosovës ka njoftuar se ka bërë identifikimin e kërcënimit të publikuar ndaj kryeministrit në detyrë Albin Kurti në rrjetet sociale. Sipas saj, postimi është bërë nga territori i Serbisë, konkretisht nga qyteti i Kralevës.

Në njoftimin e saj, Policia thotë se menjëherë pasi mori informacionin për kërcënim ndaj Kurtit nga profili “Severna Brigada” (Brigada e Veriut), organizatë e shpallur terroriste nga institucionet e Kosovës, hetimet janë zhvilluar në koordinim me Prokurorinë Speciale dhe me mbështetjen e Drejtorisë për Hetimin e Krimeve Kibernetike.

Autoritetet kanë bërë të ditur se kërcënimi është publikuar përmes llogarisë së Facebookut “facebook.com/severna.brigada.2025”, ndërsa nga hetimet është konstatuar se postimi është realizuar nga Serbia, gjegjësisht nga Kraleva.

“Me këtë rast janë identifikuar IP-adresa e përdorur dhe të dhënat personale të përdorura gjatë regjistrimit”, thuhet në njoftimin e Policisë.

Sipas autoriteteve, analizat e kryera nga njësitë kompetente kanë siguruar edhe të dhëna shtesë që pritet të ndihmojnë në hetimet e mëtejshme lidhur me rastin.

---