Pothuajse të gjithë të moshuarit 65-74 vjeç në Zvicër përdorin internetin lehtësisht

@pixabay

Hendeku digjital po mbyllet më shpejt se sa pritej. Një studim i ri nga Pro Senectute tregon se 9 nga 10 persona mbi 65 vjeç në Zvicër përdorin internetin. Tek grupmosha 65-74 vjeç, 88% kanë aftësi bazë digjitale, ndërsa për ata 75-84 vjeç përqindja është 71%. Megjithatë, tek të moshuarit mbi 85 vjeç, vetëm 43% janë në gjendje të përdorin teknologjinë.

Sipas Peter Burri Follath, përgjegjës i komunikimit në Pro Senectute, një pjesë e vogël e popullsisë më të moshuar (rreth 5-10%) mund të mos jetë kurrë online për arsye shëndetësore, transmeton albinfo.ch.

Për herë të parë, më shumë të moshuar informohen përmes pajisjeve digjitale (33%) sesa nga televizioni (30%), shtypi i shkruar (22%) apo radioja (15%). Kjo tregon një ndryshim të madh në mënyrën se si konsumojnë informacionin.

Burri Follath thekson se shërbimet publike si SSR, CFF dhe La Poste duhet të përshtaten me këto ndryshime, por edhe të mos harrojnë ata që ende nuk përdorin teknologjinë. Pro Senectute ofron gjithnjë e më shumë mbështetje individuale për të ndihmuar të moshuarit të përdorin shërbimet online në mënyrë të sigurt.