Prej sot, dënime unike në gjithë Zvicrën për ata që udhëtojnë pa bileta

Dega e transportit publik, duke u bazuar në një vendim të Parlamentit Federal, ka vendosur të ndërtojë një bankë qendrore të dhënash për të regjistruar në të personat që udhëtojnë “në të zezë” ose “në zonën gri”

Afërsisht 60 milionë udhëtime në vit në Zvicër realizohen pa biletë të vlefshme ose me ndonjë biletë pjesërisht të vlefshme. Por janë shumë më pak në numër, gjithsej 800 mijë raste që kapen, identifikohen dhe regjistrohen në regjistrat përkatës. Trafiku publik i Zvicrës, për shkak të pasagjerëve që nuk paguajnë biletat shënon humbje prej dhjetëra milionë frangash, njofton organizata tarifore e transportit publik ch-direct, shkruan 20minuten.ch.

Për të evituar këtë gjendje, dega e transportit publik, duke u bazuar në një vendim të Parlamentit Federal, ka vendosur të ndërtojë një bankë qendrore të dhënash për të regjistruar në të personat që udhëtojnë “në të zezë” ose “në zonën gri”, transmeton albinfo.ch. Dhe, kjo bankë ka filluar të funksionojë nga sot, 1 prill 2019.

Deri në fund të vitit, të gjitha ndërmarrjet e transportit, afër njëqind sosh sa janë në Zvicër, do t`i bashkohen këtij sistemi. Kjo bankë të dhënash do të ngrihet dhe drejtohet nga Postauto.

Ky regjistër të dhënash nuk e rrit çmimin e dënimit për udhëtim pa biletë por një ngritje dënimi bëhet në rast se personi i regjistruar njëherë si shfrytëzues i transportit “në të zezë”, kapet për së dyti. Me sistemin e ri, njerëzit që udhëtojnë në mënyrë të përsüëritur pa biletë të vlefshme do të ndiqen në mënyrë unike në gjithë Zvicrën, përcjell albinfo.ch. Ata do të regjistrohen në varësi nga pesha e shkeljes.

Duke qenë se të gjitha ndërmarrjet transportuese do të jenë të lidhura në një sistem të përbashkët, do të kursehen edhe shpenzimet sistemore dhe do të rritet efikasiteti në venien e faturave. Disa nga ndërmarrjet e transportit tashmë ofrojnë edhe mundësinë që në rast se pasagjeri ka harruar ta marrë me vete abonamentin, ta dëshmojë online pasjen e tij

Ch-direct garanton se i është kushtuar kujdes mbrojtjes së të dhënave, gjegjësisht të privatësisë, mbi bazën që e mundëson ligji përkatës.

---