Presidenti Begaj nderon të rënët në Prekaz

Kreu i shtetit shqiptar bëri homazhe pranë varrezave të mbi 50 të vrarëve të familjes Jashari.

Pasi ka përfunduar takimet me krerët më të lartë institucionalë në Prishtinë, presidenti i Shqipërisë, Bajram Begaj, ka vazhduar për në Prekaz, ku ka bërë homazhe në kompleksin memorial “Adem Jashari”.

Kreu i shtetit shqiptar bëri homazhe pranë varrezave të mbi 50 të vrarëve të familjes Jashari, ndërsa vizitoi edhe kullën, ku për disa minuta ka dëgjuar nga ciceroni historinë e sulmeve nga forcat e armatosura serbe, raporton Albinfo.ch.

Presidenti Begaj ka vizituar edhe muzeun në Prekaz, ku ndodhen fotografi, dokumente e dëshmi të shumta të gjenocidit serb.

Para se të shkojë në Prekaz, presidenti Begaj bëri homazhe te varri i ish presidentit të Kosovës, Ibrahim Rugova, në Velani.

Presidenti i Shqipërisë, Bajram Begaj, po qëndron për vizitë zyrtare dyditore në Kosovë. Kjo është vizita e parë jashtë shtetit që nga marrja e postit të presidentit më 24 korrik.

Në ditën e dytë të vizitës, presidenti i Shqipërisë do të takojë nesër krerët e partive opozitare, komandantin e KFOR-it, trupat e Forcave të Armatosura Shqiptare në kuadër të KFOR-it në Pejë, si dhe kryetarin e Prizrenit, Shaqir Totaj./Albinfo.ch

---