Presidenti i Afganistanit refuzon lirimin e talibanëve të burgosur

Presidenti i Afganistanit, Ashraf Ghani, ka thënë se qeveria e tij nuk është zotuar për të liruar të burgosurit talibanë, siç thuhet në marrëveshjen e arritur mes SHBA-së dhe militantëve.

Nën marrëveshjen e nënshkruar të shtunën në Katar, 5000 talibanë do të duhet të liroheshin në këmbim të 1000 të qeverisë, deri më 10 mars.

Ghani ka thënë se një lirim i tillë nga burgu “nuk mund të jetë parakusht për bisedime”, por duhet të jetë pjesë e negociatave.

Marrëveshja mes SHBA-së dhe talibanëve përfshin edhe një fazë të tërheqjes së trupave të SHBA-së.

Në këmbim, grupi islamist është pajtuar të mbajë bisedime paqësore me qeverinë afgane.

Marrëveshja po ashtu thotë se talibanët do të parandalojnë al-Qaedan dhe të gjitha grupet ekstremiste nga operimi në hapësirat të cilat i kontrollojnë.

SHBA-ja kishte hyrë në Afganistan pak javë pas sulmeve të shtatorit 2001 në New York nga al-Qaeda, atë kohë me bazë në Afganistan. Talibanët ishin hequr nga pushteti, por u bënë forcë kryengritëse aq sa më 2018 ishte aktive në më shumë se dy të tretat e vendit.

“Ulja e dhunës do të vazhdojë me një qëllim që të arrijmë armëpushim të plotë. Por, s’ka zotim se do të lirohen 5000 të burgosur. Kjo është e drejtë dhe vetë vullneti i popullit të Afganistanit. Mund të përfshihej në agjendën e bisedimeve brenda afgane, por s’mund të jetë parakusht për bisedime”, ka thënë Ghani, më pak se 24 orë pasi u nënshkrua marrëveshja, transmeton BBC.

Çdo lirim, sipas tij, nuk është në autoritetin e SHBA-së, por në të Afganistanit.

Rreth 10 mijë besohet të jetë numri i talibanëve që mbahen në burgjet e Afganistanit, përcjell Albinfo.ch.