Presidenti i Maqedonisë del kundër referendumit

Presidenti i Maqedonisë, Gjorge Ivanov, ka shfrytëzuar një takim me Diasporën e Bashkuar të Maqedonisë në Detroit të SHBA-së për të kumtuar edhe zyrtarisht lajmin se ai është kundër referendumit të 30 shtatorit.

Presidenti Ivanov nuk ka nënshkruar as ligjin për gjuhët dhe ka kundërshtuar pothuajse të gjitha nismat e Qeverisë së Zaevit.

“Dy herë kam fituar besimin e qytetarëve për të mos lejuar ndryshime të Kushtetutës, me qëllim ndryshimin e emrit kushtetues, kam fituar besimin që të mos pranoj idetë dhe sugjerimet që rrezikojnë identitetin kombëtar, të veçantën e kombit maqedonas, gjuhën maqedonase dhe modelin e Maqedonisë për bashkëjetesë. Unë nuk heq dorë nga premtimi im. Prandaj, më 30 shtator, nuk do të dal për votim”, citohet të këtë thënë ai në një njoftim të Presidencës së Maqedonsië.