Presidenti ukrainas e konsideron të padrejtë propozimin gjerman për anëtarësim

EPA/SERGEY DOLZHENKO

Presidenti i Ukrainës, Volodymyr Zelensky e ka quajtur të padrejtë një propozim gjerman për t’i dhënë Ukrainës pjesëmarrje pa të drejtë vote në institucionet e Bashkimit Evropian, sepse do ta linte Kievin pa zë brenda bllokut.

Në një letër drejtuar udhëheqësve të Bashkimit Evropian, Zelensky u shpreh se largimi i kryeministrit hungarez Viktor Orban, një kundërshtar i fuqishëm i anëtarësimit të Ukrainës në BE, kishte krijuar mundësinë për përparim të konsiderueshëm në bisedimet e pranimit.

“Do të ishte e padrejtë që Ukraina të ishte e pranishme në Bashkimin Evropian, por të mbetej pa zë. Është koha e duhur për të ecur përpara me anëtarësimin e Ukrainës në një mënyrë të plotë dhe kuptimplote”, ka deklaruar ai, raporton Reuters.

Tutje, ai ka falenderuar udhëheqësit evropianë për mbështetjen e tyre gjatë luftës, duke thënë se Ukraina po vepronte si një mburojë kundër agresionit rus për të gjithë bllokun prej 27 vendesh.

“Ne po e mbrojmë Evropën, plotësisht, jo pjesërisht dhe jo me masa gjysmake”, u shpreh ai, duke akuzuar Rusinë se po përpiqet të minojë unitetin dhe zhvillimin evropian.

Sipas tij, Ukraina meriton një qasje të drejtë dhe të drejta të barabarta brenda Evropës.

Ndryshe, para disa ditëve, kancelari gjerman Friedrich Merz sugjeroi që Ukraina të lejohej të merrte pjesë në takimet dhe institucionet e BE-së pa votë si një hap i përkohshëm drejt anëtarësimit të plotë në bllok.