Presidentja e Kosovës në Zvicër, merr pjesë në Samitin e Paqes për Ukrainën

Presidentja e Kosovës, Vjosa Osmani, ka udhëtuar në Zvicër, me ftesë të Presidentes së Konfederatës Zvicerane.

Osmani do ta përfaqësojë Republikën e Kosovës në Samitin e nivelit të lartë të Paqes për Ukrainë.

Sipas njoftimit nga Presidenca, në Samit, ajo do të jetë krahas presidentit të Ukrainës, Volodymyr Zelensky, Presidentes së Zvicrës, Viola Amherd, si dhe afër 100 liderëve e përfaqësuesve të tjerë nga e mbarë bota, transmeton albinfo.ch.

Tutje, thuhet se Osmani do ta riafirmojë përkushtimin e Republikës së Kosovës për ta vazhduar mbështetjen për Ukrainën deri në fitore, si dhe do të flasë për rëndësinë e mbështetjes gjithëpërfshirëse globale për t’u arritur paqe afatgjate dhe e qëndrueshme.

Bëhet e ditur se në qëndrimin e saj në Zvicër, ajo do të zhvillojë edhe takime bilaterale me liderë të tjerë botëror.