Presidentja Osmani kërkon interpretim nga Kushtetuesja për moskonstituimin e Kuvendit

Presidentja e Kosovës, Vjosa Osmani, i është drejtuar Gjykatës Kushtetuese me një kërkesë për interpretim lidhur me pasojat juridike që mund të lindin në rast se Kuvendi i ri nuk arrin të konstituohet brenda afatit kushtetues prej 30 ditësh, që përfundon më 26 korrik, raporton albinfo.ch.

Në një konferencë për media të martën pasdite, Osmani tha se kërkesa ka karakter preventiv dhe synon të parandalojë një krizë të thellë institucionale në vend. Ajo e cilësoi situatën si të paprecedentë në jetën politike të Kosovës dhe theksoi mungesën e konsensusit politik për të dalë nga bllokada aktuale.

“Çdo moszbatim i afateve kushtetuese duhet të ketë pasoja juridike, por deri më tani ato nuk janë sqaruar. Kjo është arsyeja pse kemi kërkuar nga Gjykata Kushtetuese që të japë interpretimin e saj lidhur me pasojat që lindin nëse Kuvendi nuk konstituohet në kohë,” tha Osmani.

Presidentja shtoi se kërkesa është një përpjekje për të shmangur “pasoja të pariparueshme për rendin kushtetues” të vendit dhe për të qartësuar se si duhet të veprojnë institucionet në mungesë të një Kuvendi funksional.

“Qëllimi është të qartësohet se si ushtrohen kompetencat e secilit institucion kushtetues nëse Kuvendi nuk konstituohet brenda afatit, por edhe çfarë ndodh nëse ky proces ndodh pas datës 26 korrik,” theksoi ajo.

Përveç kërkesës për interpretim, Presidentja ka kërkuar edhe një masë të përkohshme nga Gjykata, që të pezullohet rrjedhja e afatit 30-ditor të përcaktuar nga aktgjykimi i Kushtetueses i datës 26 qershor.

“Kjo masë do të parandalonte futjen e institucioneve në një bllokadë pa fund, nëse afati skadon pa u gjetur zgjidhje,” deklaroi Osmani.

Kuvendi i Kosovës ka dështuar ta konstituojë veten për të 50-tën herë, ndërkohë që vendi ndodhet në një ngërç institucional të thelluar. Me vetëm katër ditë të mbetura deri në përfundimin e afatit kushtetues, nuk ka sinjale për arritje konsensusi ndërmjet grupeve parlamentare, raporton albinfo.ch.