Presidentja Osmani përgjigjet në letrën e Kuvendit: Mosvazhdimi përbën shkelje kushtetuese

Foto: Vjosa Osmani

Presidentja e Republikës së Kosovës, Vjosa Osmani, ka kërkuar që seanca konstituive e Legjislaturës së Nëntë të Kuvendit të Kosovës të mbahet menjëherë, në përputhje me afatet kushtetuese dhe Rregulloren e Kuvendit. Në një letër drejtuar kryesuesit të seancës, Avni Dehari, Osmani thekson se zvarritja e procesit përbën shkelje të rëndë të rendit kushtetues dhe pengesë për themelimin e institucioneve të reja, shkruan albinfo.ch.

Duke iu referuar praktikës gjyqësore të Gjykatës Kushtetuese, Osmani citon Aktgjykimin nr. KO72/20, ku thuhet: “Struktura e normave kushtetuese që ndërlidhen me themelimin e institucioneve shtetërore që burojnë nga vota e popullit, duhet të interpretohen në atë mënyrë që të jetësojnë dhe jo të bllokojnë themelimin dhe ushtrimin efektiv të funksioneve përkatëse.”

Ajo gjithashtu citon nga i njëjti aktgjykim, ku Gjykata sqaron se: “Asnjë normë kushtetuese nuk mund të interpretohet në atë mënyrë që të bllokojë themelimin dhe funksionimin efektiv të pushtetit legjislativ dhe ekzekutiv.”

Në këtë frymë, Presidentja rikujton se qëllimi i Kushtetutës është themelimi i shpejtë dhe funksional i institucioneve shtetërore, duke shtuar se çdo ndërprerje e pajustifikuar është në kundërshtim me parimet themelore të sistemit kushtetues të Kosovës, shkruan albinfo.ch.

Po ashtu, Osmani i referohet Aktgjykimit KO119/14, ku theksohet: “Kryesuesi që kryeson seancën konstituive, edhe pse nuk është i zgjedhur, është i obliguar me Kushtetutë dhe me Rregulloren e Punës së Kuvendit për ta realizuar seancën konstituive.”

Në të njëjtën letër, Presidentja thekson se të gjitha veprimet e ndërmarra nga persona me autoritet publik duhet të jenë në përputhje me Kushtetutën dhe frymën e saj. Ajo citon vendimin e Gjykatës Kushtetuese në KO72/20: “Të gjitha veprimet që ndërmerren nga personat e veshur me fuqi ose autorizim publik, duhet të jenë në pajtim me Kushtetutën dhe frymën e saj dhe të kontribuojnë në mbarëvajtjen dhe bashkërendimin e punëve në interes publik për Republikën e Kosovës.”

Në fund, Osmani ka shprehur gatishmërinë për të ftuar në takim liderët e partive parlamentare për të diskutuar rrugën përpara, në rast se një gjë e tillë konsiderohet e nevojshme për të garantuar funksionimin institucional, shkruan albinfo.ch.