Prindërit e Astritit: Le të gjendet vrasësi i djalit tonë!

Familja e Astrit Deharit sot e ka marrë raportin e ekspertizës zvicerane për vdekjen e djalit të tyre.

Ata kanë treguar se ky raport thotë se Astriti është vrarë

Nëna e Astritit, Xhemile Dehari, u ka bërë thirrje institucioneve ta gjejnë vrasësin e djalit të saj.

“Ne të qetë kemi ardhë, se e kemi ditë se Astritin e kanë vra, por juridikisht nuk ka qenë e mbyllur. Sylë Hoxha, i vetmi që ka dalë, ka thënë se brenda 15 ditësh do ta përmbyllim si vetëvrasje, nuk iu doli vetëvrasje, le t’i hapin hetimet sipas rregullave që i ka Prokuroria për çdo rast, edhe për Astritin le ta gjejnë kush është vrasësi, ata vetë e dinë”, ka thënë Xhemile Dehari.

Ajo ka treguar se nuk e kanë lexuar raportin në tërësi, pasi kanë kërkuar nga kryeprokurori vetëm fletën e cila tregon përfundimin e ekspertizës.

“Raportin nuk e kemi lexu ende, vetëm fletën e parë, e kërkuam nga kryeprokurori përfundimin. E lexoi para nesh se është vrasje”, ka thënë nëna e Astrit Deharit.

Po ashtu babai i Astrit Deharit, Avnia, pasi ka marrë raportin nga Institutit Zviceran të Mjekësisë Ligjore, tha se sipas ekspertizës së ekspertëve të Llozanës, bëhet fjalë për vrasje e jo për vetëvrasje dhe sipas kësaj duhet hapur hetimet për vrasje.

Ai tha se përgjegjës për vrasjen e Astritit, përveç kryeprokurorit të atëhershëm Sylë Hoxhës, së bashku me kompaninë e tij dhe ministren e atëhershme të Drejtësisë, Dhurata Hoxha, janë edhe argatët e tyre.

Nga ana tjetër, Prokuroria Themelore në Prizren ka publikuar raportin e ekspertizës së Institutit të Mjekësisë Ligjore në Lozanë të Zvicrës për rastin e Astrit Deharit.

Bazuar në të gjeturat e këtij raporti, Prokuroria ka njoftuar se do të vazhdojë me hetimin e këtij rasti dhe do t’i ndërmarrë të gjitha veprimet e nevojshme, ku do t’i dëgjoj edhe ekspertët e Institutit të Mjekësisë Ligjore në Lozanë, si dhe ekspertët e Insitutit të Mjekësisë Ligjore në Kosovë, për sqarimin e raporteve të tyre dhe nëse është e domosdoshme do të bëhet një super-ekspertizë jashtë vendit në bashkëpunim dhe koordinim me partnerët ndërkombëtarë në mënyrë që të sqarohen rrethanat dhe shkaktarët e vdekjes.

“1. Ashtu siç është thënë në ekspertizën tonë El180001, ne kemi dyshime që lidhen me rrethanat e vdekjes së z. DEHARI Astrit. Në fakt hipoteza e një vetëvrasjeje e z. DEHARI Astrit përmes mjete të caktuara nga mjekët ligjor duket pak e vërtetë dhe intervenimi i një personi të tretë në proces fatal duhet të kihet parasysh.