Protesta kundër privatizimit të PTK-së

Punëtorë të Postë-Telekomit të Kosovës (PTK) kanë protestuar sot para Kuvendit të Kosovës për të kundërshtuar privatizimin, ndërkohë që Kuvendi i Kosovës është duke debatuar për Projektbuxhetin e vitit 2011, që përmban një nen që ka të bëjë me privatizimin e kësaj kompanie me fitimprurëse në Kosovë.

Përpjekja e Qeverisë për të marrë aprovimin nga Kuvendi për privatizimin e PTK-së, nëpërmjet miratimit të buxhetit, ka nxjerrë në rrugë këta punëtorë të organizuar nga Sindikata e PTK-së, për të kundërshtarë të privatizimit të kësaj ndërmarrje publike.

Kryetari i sindikatës së pavarur të PTK-së, Milazim Alshiqi, dhe ai i sindikalistëve profesionistë, Bashkim Fazliu, kanë thënë se me këtë akt Qeveria po del kundër Kushtetutës, me nenin 4 të Ligjit për buxhetin, i cili pritet të votohet sot.

Ata kanë kërkuar nga deputetët ta kundërshtojnë këtë lojë të Qeverisë dhe të mos e shesin PTK-në, ngase ajo nuk është e Qeverisë.

Ndryshe, në mbledhjen e së mërkurës, Komisionit parlamentar për legjislacion dhe gjyqësi ka marrë vendim që të rekomandojë heqjen e nenit të 4-të nga projekt-buxhetit për buxhet, ngase, sipas tyre, marrja e aprovimit në këtë formë është në kundërshtim me frymën kushtetuese dhe ligjet në fuqi të vendit.