Protestë në SHBA për vrasjen e Liridona Ademajt

Bëhet e ditur se është organizuar një tubim mbështetës (Rally), dy javë pas vrasjes së Liridona Ademaj në Kosovë, i cili është mbajtur të dielën në drekë në një trotuar të rrethuar nga barrikadat e policisë, pikërisht mes rrugës 42th St. dhe 43th St. në 2 Avenue, e cila është një nga rrugët kryesore të çon për nga ndërtesa e OKB-së, në New York, përcjell albinfo.ch.

Tubimin e të rinjve e të rejave shqiptare e mbështetën edhe kryetari i KKD-së, zoti Mark Gjonaj, ish-këshilltari i Bashkisë së Nju-Jorkut, aktivisti Gjek Gjonlekaj, ish-gazetar i Zërit të Amerikës dhe kryetari i shoqatës Ulqini, Xhemo Lanica.

I ftuar nga Tirana ishte edhe Adriatik Llapaj, kryetar i lëvizjes politike, “Shqipëria bëhet”.

Ky tubim sensibilizues u mbajt pra zyrave të Konsullatës së Përgjithshme të Republikës së Kosovës në Nju-Jork.

Disa vajza e gra me pankarta në duar, për më shumë se një orë me thirrjet e tyre, kërkuan drejtësi për Liridona Ademajn, dënimin e ndaljen për çdo rast të dhunës ndaj gruas, në Shqipëri, Kosovë dhe trevat shqiptare.

“Oda summit – Ndal femicidit”, “Denonco dhunën”, “Drejtësi sot për Liridonën’,”Gratë janë e ardhmja – Ndalni vrasjet”- “ Nuk ka Paqe, pa sigurinë e Grave”–“ Janar/Nëntor, janë 1465 raste të raportuara të dhunës ndaj grave”- “Dhunuesit dhe vrasësit e Grave, në Burg”, “Poshtë patriarkati” dhe “Nuk ka paqe pa çlirimin e grave”, ishin disa nga pankartat që të rinjtë e të rejat mbanin në duar.

Në krye të këtij tubimi qëndronte një studente me një foto të Liridona Ademaj Murselit, gruas që u vra mbrëmjen e 29 nëntorit në periferi të Prishtinës, me një skenar si në filma.

“Këtu të vrasin natën e të qajnë ditën”, shkruante pankarta e mbajtur nga Djellza Pulatani, organizatorja e protestës paqësore.

“Ne nuk do t’heshtim deri në frymën e fundit do të rezistojmë”, shkruhej në pankartin e Beti Tola.